变态色魔大家容易理解，乜嘢叫做秘密警察呢？即係咁，观塘翠屏邨近日连续有四名女学生惨遭批肘撞胸非礼，警方虽然通缉一名年约六十岁嘅秃头男子，不过冇对外公布相关消息，要经过四日之后事件先至曝光。你话嘞，行事作风竟然係咁秘而不宣，唔係秘密警察又係乜呢？

秘密警察嘅「潜行凶间」唔係第一次?喇，十月二日将军澳陷入「月黑风高插人夜」，口罩刺客分别喺四个地方出刀捅人，失惊无神有四个无仇无怨嘅路人遇害。对于一单咁得人惊嘅血案，死得佢吖，警方居然粒声唔出，事后冇向传媒报料发放消息，累到将军澳街坊懵然不知身边有个危险人物正在虎视眈眈。

好似今次再有撞胸色魔咁吖，观塘区所有人心惶惶嘅姊姊妹妹都怒插警方，认为案发之后第四日先至公布案情係罔顾佢哋嘅人身安全，担心自己沦为非礼目标都冇防範意识。

你知啦，政府箝制新闻自由係不可饶恕嘅一件事，此举等同剥削市民知情权。知情权一旦被剥削，咁就大剂嘞，香港警察随时真係变成中国公安，特区政府话唔定确係会出现专制政权，事关黑箱作业係不受监察嘅。

讲到箝制新闻自由，不

讲到新闻自由被箝制，功夫茶简直火滚。立法会上星期四答问大会，保安人员接二连三粗暴阻挠记者採访，表现仲恶过港产公安，箝制新闻自由嘅幕后黑手居然係曾荫权。根据可靠消息透露，曾荫权因为不满喺立法会遇到示威者「搭膊头」，于是透过特首办向立法会施压要求加强保安。新任特首办主任梁卓伟同政府新闻处处长黄伟纶，更加亲自去到立法会新大楼对保安人员指指点点。

呢嗱嗱嗱，讲到呢度必须提醒大家，香港奉行三权分立，行政机关理论上冇权过问立法机关。曾荫权派人干预立法会，完全係踩过界嘅离谱行为！

所以难怪香港变成示威之都?，鬼叫曾氏政权愈来愈似神枱猫屎咩。如果被警队秃鹰一哥视作「黑影」嘅记者下次再上街游行，功夫茶义务提供两句口号：踢走秘密警察，还我新闻自由！